إصرارك على الحقارة رح يخلّيني عاملك متل كتار رهنوا صوتهم للباطل، وانحازوا للظالم، وركعوا للفاسد. انت حرّ برأيك، بس ما تجرّب تعطيني نصايح أو ترشدني، وأنا بعلم معلّمينك. الظاهر كل ما سكتنا، كل ما زادت أصوات النباح. انت أكتر واحد بيعرف إني مش تيار ولا حامل بطاقة، بوقت انت كنت زاحف تحت أقدام الجنرال متل غيرك. وبتعرف إني بحكي عن الغلط قبل الصح. بس تجي تقول “برم دولابي” وتعتبر تشبيهي العام إني مع ميشال عون، دليل إنك لا فهمت ولا بدك تفهم، وإن الحقد الأعمى سيطر على عقلك وقلبك. • دولابي برم متل كل لبناني انسرق تعب عمره، ومش ميشال عون السبب. • دولابي برم لما انفجر المرفأ وتدمّرت بيروت وماتوا أهلنا، ومش ميشال عون السبب. • دولابي برم لما القضاء الرخيص المرتشي حمى الفاسدين والمهربين وزعما الانحطاط، ومش ميشال عون السبب. • دولابي برم لما العدو فجّر البيجر بإخوتي وأهلي وارتكب جريمة حرب، ومش ميشال عون السبب. • دولابي برم لما العدو الصهيوأميركي تبعك شنّ عدوان همجي وحشي وقتل آلاف الأبرياء ودمّر مناطق من وطني وهجّر الملايين، ومش ميشال عون السبب. • دولابي برم لما أمثالك طالبوا بتسليم سلاح الشرف والكرامة لعدو مجرم كل يوم يعتدي ويغتال ويدمّر، وناطر عملاء الداخل يساعدوه ليحتل الجنوب ويمكن بيروت ويرتكب عشرات صبرا وشاتيلا وقانا… ومش ميشال عون السبب. دولابي برم مش عن شغلي—يلي الحمدلله منيح—برغم وضع الدراما المتدهور، ولغياب دولة مفروض تعمل خطط بدل ما تقتسم حصص ومكاسب، وتلفّق ملفات، وتظلم أصحاب الودائع، وتسجن مدرا أوادم، وتطرد الباقيين بانتقام مشين، وتمنع عرض مسلسلاتنا على الشاشات بلا أي خطط جدّية لدعم آلاف الممثلين والمخرجين والكتّاب وصنّاع الدراما. وأكيد لا ميشال عون السبب، ولا السلاح، ولا الأوادم… بل عصابة احترفت الفساد، وتضامنت بوجوه، وركعت للسفارات. قريت قبل وما فهمت وجعي على بلدي وأهلي. وأكيد هلّق رح تقرا ومش رح تفهم. ويمكن غلطت إنّي وديت وعطيتك قيمة ما بتستحق، وأنا في ناس أرقى منك بكتير مش قاريهم ولا معتبرن.